امبارح خرجت مع جوزى ..تغيير وانتعاش لرتم حياتنا ..وكنت وانا معاه حاضنة ايديه وحاسة بسعادة غريبه كأنى بفترة الخطوبة ورومانسيتها ودلعها
واحنا ماشيين كان فيه محل عارض صوره كبيرة طوليه لنانسى عجرم وفجأة ..؟ لقيت جوزى بدون وعى ولا ادراك ولكن بصوت مسموع بيقول :
اللهم عجرم نساءنا .......
وبدهشة من كلام سألته : بعجر نساءنا يعنى ايه ؟
رد وهو برضه متنح بالصورة : يابنتى يعجرمكم يعنى نانسى تبهت عليكم ..تبيضوا شوية ..عينيكم تلون شويه ..شعركم يسيح وعلى الخدود الورد يهفهف زيها ..اهى روايح لبنان تهب عليكم والسلام
وبضيق صرخت فيه :دول كلهم صناعى ..مسلكنين ,مكلوجين ,نافخين , وضاربين لينسز يعنى ستات مقلب صناااااااااعى
ببرود كعادته رد : المهم النتيجة .. ستات قمر ....يا رب ستات مصر ييجى لهم عدوى منهم ...
اقولك نكتة صاحبى قالهالى بمناسبة ستات لبنان وحلاوتهم
مرة واحد مصرى قابل واحد لبنانى سأله :ازاى بيكون يومك
رد اللبنانى : بالنهار راكب همر وباليل جنبى قمر..
سأل اللبنانى المصرى : وانت كيف يكون يومك
رد المصرى : بالنهار راكب تريلا وباليل جنبى غوريلا
وبعصبية ونار وضيق ما بعده حدود نزعت ايدى من ايده ..ومشيت وانا جنبه
متجاهلاه ولوقت ما وصلنا الشقة وبيننا صمت رهيب بعد الخروجاية المعكننه ال خرجهالى
بعد وصولنا نظرلى فى دهشة وببراءة كأنه معملش شئ يزعل :
مالك يا حبيبتى انتى زعلانة منى ؟
رديت بغل ونااااااار : لا طبعاً هى تصرفاتك دى تزعل ...دى تحرق ...تجنن ..تولع .. كل ده ومعملتش شئ
أنا مستغربة من الراجل الشرقى .مبيعرفش ازاى يعامل مراته ..ازاى يرضيها ويسعدها حتى بأقل كلمة حلوة
رغم ان المرأة الشرقية طيبة وقنوعه والراجل ممكن يملك قلبها وحياتها بكلمة حلوة بس .........انت ازاى كده ؟؟؟؟
رد وبعيونه خجل مصطنع :يا حبيبتى نسيت انك شيوعية .. يووو اسف يا حبيبتى اقصد رومانسية ...انا بس كنت بهزر معاكى
حركت عينى على اى شئ بالغرفة غير وشه وقلت :
حصل خير يا زوجى العزيز